ਸਾਰੰਗ ਰਾਗ ਸਰੋਤ : ਪੰਜਾਬ ਕੋਸ਼–ਜਿਲਦ ਪਹਿਲੀ, ਭਾਸ਼ਾ ਵਿਭਾਗ ਪੰਜਾਬ

ਸਾਰੰਗ (ਰਾਗ)  : ਇਕ ਰਾਗ ਜੋ ਕਾਫ਼ੀ ਥਾਟ ਦਾ ਔੜਵ ਸ਼ਾੜਵ ਜਾਤੀ ਦਾ ਹੈ। ਇਸ ਨੂੰ ਨਿਸ਼ਾਦ ਸ਼ੁੱਧ ਅਤੇ ਕੋਮਲ ਦੋਵੇਂ ਲਗਦੇ ਹਨ, ਬਾਕੀ ਸਾਰੇ ਸ਼ੁੱਧ ਸੁਰ ਹਨ। ਸਾਰੰਗ ਦੇ ਗਾਉਣ ਦਾ ਵੇਲਾ ਦੁਪਹਿਰ ਹੈ। ਸਾਰੰਗ ਵਿਚ ਵਾਦੀ ਰਿਸ਼ਭ ਅਤੇ ਸੰਵਾਦੀ ਪੰਚਮ ਹੈ। ਆਰੋਹੀ ਵਿਚ ਧੈਵਤ ਵਰਜਿਤ ਹੈ ਅਤੇ ਅਵਰੋਹੀ ਵਿਚ ਵੀ ਦੁਰਬਲ ਹੋ ਕੇ ਲਗਦਾ ਹੈ।

        ਆਰੋਹੀ–ਸ ਰੇ ਮ ਪ ਨੀ ਸਂ

        ਅਵਰੋਹੀ–ਸਂ ਧ ਨੀ ਪ ਮ ਰੇ ਸ

        ਇਸ ਰਾਗ ਦੇ ਕਈ ਭੇਦ ਹਨ। ਉੱਪਰ ਲਿਖਿਆ ਸ਼ੁੱਧ ਸਾਰੰਗ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿਚ ਸਾਰੰਗ ਦਾ ਨੰਬਰ ਛੱਬੀਵਾਂ ਹੈ।